Friday, 18 February 2011

သုံးပန်လှ(သို့မဟုတ်)ဖာတစ်လုံးခင်မောင် 1

        အောင်ဇေယျ ရုပ်ရှင်မှ ဒါရိုက်တာ ဦးအောင်မြတ်က ခင်မောင်၊ ခင်မောင်မြင့်၊ မေချစ်၊ ခင်ဖြူတို့နှင့် (မေ့သည်းချာ) အသံထွက်ကို ရိုက်ကူးပြီး ၆-၅-၅၅ တွင် ရိုင်ရယ်ရုံမှာ ပြခဲ့သည်။ အေ၀မ်းဖလင် အတွက် ဒါရိုက်တာ ဦးတင်ယုက ခင်မောင်၊ ကြည်ကြည်ဌေး (နှစ်ကိုယ်ခွဲ) မန်းလှဖေတို့နှင့် (အကျော်အမော်) အသံထွက်ကို ရိုက်ကူးပြီးလျှင် ၃-၁၂-၅၄ တွင် ရိုင်ရယ်နှင့် ရောက်စီရုံတို့မှာ ပြခဲ့ရာ စူပါ့စူပါ ၀င်ငွေ ၁၇၉၆၉၂ ကျပ်ရခဲ့သည်။ သူသည် နောက်ပိုင်းတွင် အေ၀မ်းဖလင်နှင့် ကံပြန် မဆုံခဲ့တော့ပေ။

ဓနသိဒ္ဓီ ဖလင်မှ သရုပ်ဆောင် ဒါရိုက်တာ ဦးချင်းစိန်က ခင်မောင်၊ ဖိုးပါကြီး၊ တင်တင်မူ၊ မြင့်မြင့်တင်၊ ဦးချင်းစိန်၊ ဒေါ်စောရင်၊ ဒေါ်မေနွဲ့တို့နှင့် (ကိုယ့်ရင်သွေး) အသံထွက်ကို ရိုက်ကူးခဲ့သည်။ ယင်းဇာတ်ကား၏ ဇာတ်ထုံး ဖွဲ့ထားပုံမှာ ကျေးဇူးတရား သိတတ်ပုံနှင့် မသိတတ်ပုံ တကယ့် စိတ်ရင်းနှင့် သူတစ်ထူးအား မိမိ၏ ကိုယ်ကျိုးကို မကြည့်ဘဲ စေတနာ သန့်သန့်ဖြင့် အနစ်နာခံကာ ကူညီခဲ့ သူကို ကျေးဇူး ကန်းခဲ့သဖြင့် တန်ပြန် ခံစားရပုံ လူ့သဘာဝ အကြောင်းကို သင်ခန်းစာပေး တင်ပြခြင်း ဖြစ်သည်ကို ကြည့်ရှု မှတ်သားမိပေသည်။

ဖော်ပြပါ ဇာတ်ကားမှ သူ၏ သရုပ်ဆောင် သွားပုံနှင့် ပတ်သက်၍ သူ၏ တည်ကြည်ရိုးဖြောင့် အင်္ဂါရုပ်နှင့် သူပါဝင်ရသော ၀တ်လုံတော်ရ ဇာတ်ကောင်ရုပ်မှာ လိုက်ဖက်ပြီး နိုင်နင်းစွာ သရုပ်ဆောင် သွားနိုင်သည်ဟု ထိုစဉ်က သတင်းစာ ဆရာများက တစ်သံတည်း ပြောဆို ရေးသားခဲ့ကြသည်။ (ကိုယ့်ရင်သွေး) သည် ၂၅-၁၁-၅၅ တွင် မြို့မ၊ ရိုင်ရယ်ရုံတို့မှာ ပြရာ စူပါဝင်ငွေ ၁၂၁၄၅၀ ကျပ် ရခဲ့သည်။

၁၉၅၆ ခုနှစ်တွင် သူပါဝင်ခဲ့သော အသံထွက် ဇာတ်ကား နှစ်ကားရုံတင်ပြ သွားရာ လူကြီးမိဘ များသည် မိမိတို့၏ သဘော ဆန္ဒအရ သားသမီးများ၏ အလို မတူဘဲ သားသမီးများရဲ့ အိမ်ထောင်ရေးကို ချုပ်ခြယ် စိုးမိုးမှုကြောင့် မပျက်စီးသင့်ဘဲ ပျက်စီးခဲ့ ကြရသည်ကို ဇာတ်လမ်း ဖွဲ့ထားသော (ငယ်ကျွမ်းဆွေ)ကို ဒါရိုက်တာ ဦးအောင်ဇံက အောင်ရုပ်ရှင် အတွက် ခင်မောင်၊ ခင်မောင်မြင့်၊ တင်တင်မူ၊ မြင့်မြင့်ဌေး၊ ဖိုးပါလေး၊ ဂျော်လီဆွေ၊ ကြယ်နီ၊ မစိန်တိုဖပနှင့် ရိုက်ကူးခဲ့သည်။ (ယင်းဇာတ်ကားတွင် ပါဝင်သူ အားလုံးမှာ မင်းသားခင်မောင်မှ အပပြဇာတ် စင်မြင့်ပေါ်တွင် နာမည် ကျော်ကြားမှု ရခဲ့သူများ ဖြစ်ကြသည်။) ငယ်ကျွမ်းဆွေ ဇာတ်ကားနှင့် ပတ်သက်၍ ထိုစဉ်က သတင်းစာ ဆရာများက အောက်ပါအတိုင်း မှတ်ချက်ပေး ပြောဆိုခဲ့သည်။

ပုံစံအမျိုးမျိုး မဟုတ်ဘဲ သဘာဝတွင် ဖြစ်ပျက်တတ်သည့် အတိုင်း ဇာတ်သွားကို ယူသွားရာ ကြည့်ရ အရသာရှိသည်။
သမာဓိ သတင်းစာ။

သားပျို သမီးရှင်များ မမှားတန်သည်ကို မမှားရအောင် ပြုပြင် သတိပေး ညွှန်ပြသည့် အချက်များ ပါ၍ သဘာဝကျကျ ဇာတ်သိမ်း လိုက်သဖြင့် ရုပ်ရှင်အဆင့်တစ် ထစ်ခုန် တက်လာ၏။
ထွန်းနေ့စဉ် သတင်းစာ။

. . . . ငယ်ကျွမ်းဆွေကို ပရိသတ်က လက်ခံ လိုက်သည်ဆိုလျှင် ရုပ်ရှင်လောက အဆင့်အတန်း တိုးတက်လာပြီဟု ဆိုနိုင်သည်။
မဏ္ဍိုင် သတင်းစာ။

(ငယ်ကျွမ်းဆွေ) ဇာတ်ကားကို ၂၀-၂-၅၆ တွင် အိတ်ဆယ်စီယာရုံကြီးမှာ ပြသရာ စူပါဝင်ငွေ ၁၀၃၈၄၇ ကျပ် ရသည်။ ဒါရိုက်တာ စိန်မြင့်က ခင်မောင်၊ တင်တင်မူ၊ ဂုဏ်မေကျင်၊ ကြယ်နီ၊ မစိန်ခင်၊ သောကြာတို့နှင့် (မေ့ပါနဲ့ သက်ဝေ) အသံထွက်ကို ဖန်တီးပြီး ၂-၄-၅၆ တွင် သွင်ရုံမှာ ပြသရာ စူပါဝင်ငွေ ၁၀၁၂၅၄ ကျပ် ရသည်။ ယင်းဇာတ်ကားတွင် ပါဝင်သော မင်းသား ခင်မောင်နှင့် မင်းသမီး တင်တင်မူတို့မှာ တစ်ဇာတ်လုံးကို သူတို့ နှစ်ယောက်၏ အမူအရာ သရုပ်ဆောင်မှု များဖြင့် ပွဲကြည့် ပရိသတ်များအား ထိန်းသိမ်း စွဲဆောင် နိုင်လောက်အောင် သရုပ်တူများ လုပ်ဆောင်နိုင် ကြတယ်ဟု ရုပ်ရှင် ဝေဖန်ရေး ဆရာတို့က ဆိုခဲ့ကြသည်ကို မှတ်သားမိ၏။


အမျိုးသား ရုပ်ရှင် လုပ်ငန်းကြီး အသံထွက် ခေတ်သို့ အပြီးတိုင် ကူးပြောင်းခဲ့သော ၁၉၅၇ ခုနှစ်တွင်သူ ပါဝင်တဲ့ ရုပ်ရှင် (၃) ကား ရုံတင်သွားရာ တစ်ကားမှာ သူကိုယ်တိုင် သရုပ်ဆောင် ဒါရိုက်တာ အဖြစ် ရိုက်ကူးသော ရုပ်ရှင်ဖြစ်သည်။ အသံထွက် ခေတ်ဦးတွင် သူပထမဆုံး ပါဝင်တဲ့ ဇာတ်ကားမှာ လျှပ်စစ်ရုပ်ရှင် အတွက် သန်းနွဲ့ ဇာတ်ညွှန်းကို ဒါရိုက်တာ ဦးချင်းစိန်က ခင်မောင်၊ ဇေယျ၊ မြင့်မြင့်ဌေး၊မေမြ၊သန်းနွဲ့၊ ဒေါ်ခင်ညွန့်၊ ဦးဘ ချစ်၊သာ ဂေါင်ကြီးတို့နှင့်(ဆွေဂုဏ်မျိုးဂုဏ်) အသံ ထွက်ကားကို ရိုက်ကူးပြီး ၃-၅-၅၇တွင် ရွှေဂုန် ရုံမှာ ပြရာစူပါဝင်ငွေ ၁၀၂၁၃၄ ကျပ် ရခဲ့သည်။

(ရေစက်မကုန်) ကို ဒါရိုက်တာ မောင်လှတင်က အောင်ဇေညွန့်ညွန့် ဖလင်အတွက် ခင်မောင်၊ မြင့်မြင့်ဌေး၊ မေချစ်၊ ရွှေကို၊ မေမေ၀င်း၊ ချစ်မောင်တို့နှင့် ရိုက်ကူးပြီး ၃၀-၈-၅၇ တွင် ဘုရင့်နှင့် ဂျမားရုံတို့ ပြသရာ စူပါဝင်ငွေ ၁၀၂၁၃၄ ကျပ် ရခဲ့သည်။ သူ၏ ရုပ်ရှင်သက်တမ်း တစ်လျှောက်တွင် တစ်ကားတည်းသော အသံထွက် ရုပ်ရှင် အနုပညာ ပစ္စည်း တစ်ခုကို သရုပ်ဆောင် ဒါရိုက်တာ အဖြစ် ဖန်တီးသွားရာ ယင်းဇာတ်ကားမှာ စာရေးဆရာ ပြည့်စုံ၏ ၀တ္ထုဇာတ်ညွှန်း ဖြစ်ဖြစ်သော (လွမ်း ခွေရစ်သီ) ဖြစ်သည်။ ဖော်ပြပါ ဇာတ်ကား၏ ဇာတ်လမ်းမှာ ဂျပန်ခေတ်တွင် ပေါင်းတည် မြို့ ၌ တပည့် ဖြစ်သူနှင့် နေထိုင်သော ကိုဘချစ်သည် ရန်ကုန်၌ ပြဇာတ် က၍နေသော စိုးစိုးနှင့် ဒေါ်မြလေး၏ အောင်သွယ် ပေးမှုကြောင့် စာချင်း အဆက်အသွယ် ဖြစ်ကာ ဓာတ်ပုံအပို့ ခိုင်းလိုက်လေသည်။

No comments:

Post a Comment

မောင်ချစ်မှ လာကြည့်သူအပေါင်းတို့ကိုယ်စိတ်နှလုံးရွှင်လန်းကြပါစေလို့ဆုမွန်ကောင်းတောင်းလျှက်ပါ၊