Wednesday 16 February 2011

ဆူးပစ်စမ်း မီးဘေး၊ ၈၀၀ ကျော် အိုးအိမ်မဲ့

အိမ်ခြေ ၁၈၄ မီးလောင်မှုတရပ် မကွေးမြို့နယ် ဆူးပစ်စမ်းရွာ၌ ပြီးခဲ့သည့် စနေနေ့တွင် ဖြစ်ပွားခဲ့ရာ လူဦးရေ ၈ဝဝ ကျော် အိုးအိမ်မဲ့ ဖြစ်သွားကြောင်း ဒေသတွင်း မီးသတ်ဌာနများနှင့် ရွာသားများက ပြောသည်။

အိမ်ခြေ ၂၇ဝ ကျော်ရှိ ဆူးပစ်စမ်းတွင် ယခုလ ၁၂ ရက်နေ့ မွန်းလွဲပိုင်း၌ မီးကြွင်းမီးကျန်မှတဆင့် စတင်၍ မီးလောင်ခဲ့ကြောင်းနှင့် ၎င်းကျေးရွာမှာ မကွေးနှင့် မိုင် ၄ဝ ကျော်၊ တောင်တွင်းကြီးနှင့် မိုင် ၂ဝ ကျော် ဝေးသဖြင့် မီးသတ်ကားများ သွားရောက်ရန် အချိန်ကြန့်ကြာသဖြင့် အိမ်ခြေအများအပြား မီးဘေး သင့်ခဲ့ရကြောင်း ယင်းနှစ်မြို့နယ် မီးသတ်ဌာနများက ဆိုသည်။

“မီးသွားငြှိမ်းဖို့ သွားရတဲ့ ခရီးကလည်း ဝေးတယ်။ ဟိုရွာရောက်တော့လည်း ရေရှားတော့ ရေတခါကုန်ရင် ရေကန်ကို တခါသွားပြီး သယ်နေရတော့ နိုင်နိုင်နင်းနင်း ငြှိမ်းနိုင်ဖို့က အခက်တွေ့တယ်။ မြို့နဲ့ အလှမ်းဝေးတဲ့ ရွာတွေမှာ လောင်ရင် ဒါမျိုးတွေက ဖြစ်နေကျလိုပါပဲ” ဟု မကွေးတိုင်း မီးသတ်ဌာန တာဝန်ရှိသူတဦးက မဇ္ဈိမကို ပြောဆိုသည်။

မကွေးမှ မီးသတ်ကား ၂ စီးနှင့် တောင်တွင်းကြီးမှ ၂ စီးဖြင့် ငြှိမ်းသတ်ပေးခဲ့ကာ၊ ယခုမီးမှာ ပေါ့ဆမီးဟု တောင်တွင်းကြီး မြို့နယ် မီးသတ်ဌာန တာဝန်ရှိသူ တဦးက ပြောသည်။

ရေသယ်ယူရေး ခက်ခဲသောကြောင့် ထိရောက်စွာ မငြှိမ်းနိုင်သဖြင့် ရွာခံများနှင့် ရွာနီးနားချင်းများက ရေပုံးများ၊ မီးချိတ်၊ မီးကပ်များ၊ သဲအိတ်များဖြင့်သာမက အဝတ်များကို ရေစွတ်၍ပါ ဝိုင်းငြှိမ်းခဲ့ရကြောင်း ဒေသခံများ အဆိုအရ သိရသည်။

“မြို့ပေါ်က မီးသတ်ကားတွေလာတာ တော်တော်နောက်ကျတယ်။ အနည်းဆုံး ၃ နာရီကျော်လောက်မှ ရောက်လာတယ်။ သူ့ကားထဲက ရေကလည်း ခဏလေး ပက်လိုက်တာနဲ့ ကုန်သွားတော့ ရေတခါ သွားသယ်နဲ့ အလုပ်မဖြစ်ဘူး။ အားလုံးဝိုင်းပြီး သတ်ကြလို့တာ ဒီလောက်နဲ့ ပြီးသွားတာ။ နို့မို့ဆို ရွာလုံးကျွတ်တယ်” ဟု ဒေသခံကုန်သည်တဦးက ပြောဆိုသည်။

မီးလောင်သွားသည့် အိမ်များမှ လှည်း၊ ထွန်နှင့် သိမ်းဆည်းထားသည့် ကောက်ပဲသီးနှံများ မီးထဲပါသွားသဖြင့် စိုက်ပျိုးရာသီရောက်လျှင် တောင်သူများအနေဖြင့် အခက်တွေ့မည်ဟု ဆိုသည်။

မီးဘေးဒုက္ခသည် ၈၀၀ ကျော်အတွက် မြိ်ု့နယ်နှင့် ရပ်ကွက် အာဏာပိုင်များက ကယ်ဆယ်ရေးစခန်း ပြုလုပ်ပေးရန် စီစဉ်နေပြီး၊ အနီးတဝိုက် ရွာများက အစားအသောက်များ လှူဒါန်းကြသည်။ အချို့မှာ အနီးအနား ရွာများရှိ ဆွေမျိုးများထံ သွားရောက်ခိုလှုံနေကြသည်။

“မယကတို့ ဘာတို့က အခုမှ စီစဉ်တုန်း။ ရွာနီးချင်းတွေက ဝိုင်းဝန်းကူညီလို့သာ ထမင်းမငတ်တာ။ အစိုးရပိုင်းက ဘာမှ ထိထိရောက်ရောက် ကူညီမှု မပေးသေးဘူး” ဟု ကုန်သည်ကပင် ပြောသည်။

ယခုနှစ် ဇန်နဝါရီလအတွင်း နိုင်ငံတဝှန်း မီးလောင်မှု ၇၂ ကြိမ် ဖြစ်ပွားခဲ့ပြီး မီးဘေးဒုက္ခသည် ၈၁၆ ဦး ရှိကာ ဆုံးရှုံးမှုတန်ဖိုး ကျပ် ၅ ဒဿမ ဝ၄ သန်း ကျော်ရှိသည်ဟု မြန်မာနိုင်ငံ မီးသတ်ဦးစီးဌာန စာရင်း ထုတ်ပြန်ချက်က ဆိုသည်။ အိမ်ခြေအဆောက်အအုံ ၁၆၂ လုံး ပျက်စီးခဲ့ပြီး၊ သေဆုံးသူ ၅ ဦးနှင့် ဒဏ်ရာရသူ ၁၂ ဦး ရှိသည်။ မီးဖိုမီး အပါအဝင် ပေါ့ဆမီး ၅၁ ကြိမ်၊ ကျေးရွာမီးလောင်မှု ၂၆ ကြိမ် ပါဝင်ခဲ့သည်။

ပြီးခဲ့သည့်နှစ် နိုဝင်္ဘာလအထိ မီးလောင်မှု ၇၁၄ ကြိမ်တွင် ပေါ့ဆမီး ၃ဝ၈ ကြိမ်၊ ၂ဝဝ၉ ခုနှစ် မီးလောင်မှု ၈၅၆ ကြိမ်တွင် ပေါ့ဆမီး ၄၂၂ ကြိမ် ရှိခဲ့သည်ဟုလည်း ထုတ်ပြန်ခဲ့သည်။

No comments:

Post a Comment

မောင်ချစ်မှ လာကြည့်သူအပေါင်းတို့ကိုယ်စိတ်နှလုံးရွှင်လန်းကြပါစေလို့ဆုမွန်ကောင်းတောင်းလျှက်ပါ၊