Saturday, 19 March 2011

အာဏာခွက်စောင်း လုကြတော့မည့်သတင်း

zaw gyi one
ရွေးကောက်ပွဲမှ ပေါ်ထွက်လာတဲ့ လွှတ်တော်များရှိ တိုင်းနှင့်ပြည်နယ် ဒေသကြီး ဝန်ကြီးချုပ်များနဲ့ အာဏာပိုင် အဖွဲ့အစည်းများဟာ လက်ရှိ အာဏာပိုင် အမြင့်ဆုံးဖြစ်သော တိုင်းမှူးများနဲ့ အာဏာခွက်စောင်း လုကြတော့မယ့် သတင်းကို ပြည်တွင်းရှိ  စစ်ဖက်နီးစပ်သူများက စည်းလုံးခြင်းရဲ့အင်အား ဝက်ဘ်ဆိုဒ်သို့ ပေးပို့လာပါတယ်။  ရွေးချယ်ထားတဲ့ ပြည်နယ်/တိုင်း ၀န်ကြီးချုပ်များအတွက်  ရုံးအဆောက်အဦး၊ အိမ်၊ ဧည့်ကြိုကား၊ လုံခြုံရေး ယာဉ်တန်းကား၊ ရုံးသုံးကား၊ VIP ကား၊ ဖုန်း၊ ပရိဘောဂပစ္စည်း၊ လေအေးပေးစက်၊ ကွန်ပျူတာ၊ အင်တာနက်၊ ရိပ်သာ၊ ရေခဲသေတ္တာ၊ မီးခံသေတ္တာ၊ ဂေါက်ကွင်း၊ သက်သာချောင်ချိရေး စတဲ့ အဆောင်အယောင်များကို လက်ရှိ တိုင်းမှူးများရဲ့ ပိုင်ဆိုင်မှုထဲမှ ခွဲပေးနေရတယ်လို့ စစ်ထောက်ဌာန အပါအဝင် စစ်ဦးစီးအရာရှိများမှ တဆင့် သိရှိရပါတယ်။ ယခင်က “ပယက” လို့ခေါ်တဲ့ တိုင်းနဲ့ပြည်နယ် အုပ်ချုပ်ရေးအဖွဲ့မှာ တိုင်းမှူး၊ မင်းကြီးလို့ ခေါ်ဆိုတဲ့ အထွေထွေ အုပ်ချုပ်ရေးဦးစီးမှူး၊ ရဲမင်းကြီးလို့ခေါ်တဲ့ တိုင်းနဲ့ပြည်နယ် ရဲတပ်ဖွဲ့မှူး၊ တိုင်းနဲ့ပြည်နယ် လဝကမှူးနဲ့ တိုင်းနဲ့ပြည်နယ် အတွင်းရေးမှူးတို့သာ လက်ချိုးရေလို့ရအောင် ရှိခဲ့ပြီး တိုင်းမှူးရဲ့ အာဏာဟာလည်း လုပ်ချင်သလို လုပ်နေခွင့်ရရှိတဲ့ ဘုရင်ငယ် တစ်ပါးပမာ အာဏာရှင် ပေါက်စတစ်ဦး ဖြစ်ခဲ့ပါတယ်။
အခုအခါမှာတော့ တိုင်းမှူးရဲ့ စီးပွားရေးနှင့်အုပ်ချုပ်ရေး၊ လုပ်ပိုင်ခွင့် အခွင့်အရေးများ အားလုံးဟာ လျော့ပါးတော့မယ့် အခြေအနေများအပေါ် တိုင်းမှူးများက စတင် မကျေမနပ် ဖြစ်နေကြကြောင်း သိရှိရပါတယ်။ စီးပွားရေး လုပ်ပိုင်ခွင့်ရထားတဲ့ တိုင်းမှူးအချို့ထံ ချဉ်းကပ် လက်ဝါးချင်းရိုက်ထားတဲ့ ကုန်သည် စီးပွားရေးသမားများကလည်း နောက်တက်လာမယ့် အာဏာပိုင်နဲ့သာ ဆက်စပ်ဆောင်ရွက်ရန် ပြင်ဆင်လာတဲ့ အရိပ်အရောင်တွေ တွေ့ရှိရပါတယ်။ အပတ်စဉ် ဂေါက်ပွဲ Sponsor ပေးပွဲများကို ကုန်သည်များက ဝိနည်းလွတ် အကြောင်းပြချက်များ ပေးပြီးတော့ ရှောင်ရှားလာကြပါတယ်။ ရဲနဲ့ အထွေထွေ အုပ်ချုပ်ရေးဦးစီးဌာနမှ ဝန်ထမ်းအချို့တို့ကလည်း လွှတ်တော်ခေတ်တွင် သူတို့သာ အာဏာပိုင် ဖြစ်လာမယ်လို့ နားထင်သွေးကြွ ပြောဆိုကာ တပ်အချို့အပေါ် မလေးမစား ဆက်ဆံလာလို့ တပ်ရင်းမှူးငယ်များမှလည်း မကျေနပ်မှုများ စတင်လာပြီ ဖြစ်ပါတယ်။ နအဖ ခေတ်တုန်းကပင် ပြဿနာတချို့ ဖြစ်ခဲ့ရပြီး အာဏာခွက်စောင်း လုခဲ့ကြတဲ့ ဖြစ်စဉ်တစ်ခုအား တင်ပြရရင် အလယ်ပိုင်းတိုင်း စစ်ဌာနချုပ် နန်းတွင်း ဧည့်ရိပ်သာကို မကြာခဏ လာရောက်တည်းခိုနေတဲ့ စက်မှု (၁) ဝန်ကြီး  ဦးအောင်သောင်းကို တိုင်းမှူး ဗိုလ်ချုပ်တင်ငွေက တည်းခွင့်မပြုကြောင်း အမိန့်ထုတ်တဲ့အထိ ဖြစ်ခဲ့ဖူးသလို တိုင်းမှူး ဗိုလ်ချုပ်ကိုကို လက်ထက်တုန်းကလည်း ဝန်ကြီးများအား အာဏာပိုင်အဖွဲ့အစည်း မဟုတ်ဘူးလို့ ဝေဖန်ခဲ့ဖူးပါတယ်။ တကယ်တော့ စည်းစိမ်ဥစ္စာ ယစ်မူးနေကြတဲ့ စစ်ဗိုလ်ချုပ်တွေနဲ့ တိုင်းနဲ့ပြည်နယ် ဝန်ကြီးချုပ်တို့ဟာ ထိပ်တိုက် တွေ့ကြရတော့မယ့် အခြေအနေမှာ ရှိနေကြလို့ ပြည်သူလူထုကတော့ မြေဇာပင်ဘ၀မှာဘဲ ကျွဲနှစ်ကောင်ခတ်တာကို စောင့်ကြည့်ကြပါတော့လို့ ပြည်တွင်းမှ သတင်း ပေးပို့လာပါတယ်ခင်ဗျား။

No comments:

Post a Comment

မောင်ချစ်မှ လာကြည့်သူအပေါင်းတို့ကိုယ်စိတ်နှလုံးရွှင်လန်းကြပါစေလို့ဆုမွန်ကောင်းတောင်းလျှက်ပါ၊