ယခု အကြောင်းအရာကို ရေးသည့်အခါတွင် အခြား အရှေ့တောင် အာရှနိုင်ငံများ ဖြစ်ကြသည့် မြန်မာပြည်၊ ထိုင်း၊ အိန္ဒိယ နှင့် နောက်ဆုံး မလေးရှားနိုင်ငံများကို ထည့်သွင်း မထောက်ပြလိုပါ။ အဘယ်ကြောင့် ဆိုသော် ထိုနိုင်ငံများသည် သူတို့ကိုယ်သူတို့ သူတို့ကိုယ်ပိုင် ယဉ်ကျေးမှု နှင့် ရပ်တည်ကြပြီး၊ သူတို့သည် အာရှတိုက်သား စစ်စစ်၊ အာရှနိုင်ငံ စစ်စစ် အဖြစ် ခံယူထားကြသည့် ကိုယ့်လူမျိုး၊ ကိုယ့်ယဉ်ကျေးမှု ကိုယ်ပိုင် ဖြင့် ရပ်တည် နေသည့် နိုင်ငံများ ဖြစ်သောကြောင့် ဖြစ်ပေသည်။
မိမိကိုယ်မိမိ Little Europe ဟု ဂုဏ်ဖော်ပြီး၊ ဥပရောပ အတွေးအခေါ်၊ ဥရောပ အကျင့်စရိုက်၊ဥရောပ စကား ပြောသည်ဆိုသည့် ဥရောပ အယောင်အဆောင် အတုခိုးနေသည့် စင်င်္ကာပူနိုင်ငံကိုဖြင့် သူတို့၏နိုင်ငံသားများ သည် အမှန်တကယ်ပင် ဥရောပတိုက်သားများ ကဲ့သို့ လူ့ယဉ်ကျေးမှု ရှိကြပါသလား ဆိုသည်ကို ဦးစွာ ထောက်ပြရပါဦးမည်။
ဥရောပတိုက်သားများ ခံယူကြသည့် လူ့ယဉ်ကျေးမှုဆိုသည်မှာ အခြေခံ လူ့အခွင့်အရေး ဖြစ်သည့် မည်သည့် လူမျိုးဖြစ်စေ၊ မည်သည့် နေရာတွင် အခြေချ နေထိုင်သူဖြစ်စေ၊ ယောက်င်္ကျား ဖြစ်စေ၊ မိန်းမ ဖြစ်စေ၊ မည်သည့် မူရင်း မူလ အမျိုးအနွယ်ဖြစ်စေ၊ မည်သည့် အသား အရောင်ဖြစ်စေ၊ မည်သည့် ဘာသာစကား ပြောသူမဆိုဖြစ်စေ၊ မည်သည့် ဘာသာကို ယုံကြည်ကိုးကွယ်သည် ဖြစ်စေ သို့မဟုတ် အခြား မည်သည့် အဆင့်အတန်း ဖြစ်စေ၊ ပညာတတ်သည် ဖြစ်စေ၊ ပညာ မတတ်သည် ဖြစ်စေ၊ ဆင်းရဲသည် ဖြစ်စေ၊ ချမ်းသာသည် ဖြစ်စေ၊ လူသတ္တဝါမှန်သမျှ ခွဲခြားခြင်း မပြုဘဲ တန်းတူညီမျှ ဆက်ဆံခြင်း ဖြစ်ပေသည်။
သြစတေးလျ နိုင်ငံတွင် လမ်းဘေးတွင် တံပျက်စီးလှည်း နေသူအား “ဒီကောင် လမ်းဘေးမှာ တံပျက်စီး လှည်းနေတဲ့ ကောင်ပါကွာ” ဟု မည်သူ တစ်ဦး တစ်ယောက်ကမှ မပြောပေ၊ ထိုသို့ ပြောသူပင်လျှင် လူ့ယဉ်ကျေးမှု မရှိသူ အဖြစ် ရှက်စရာ ကောင်းမည် ဖြစ်ပေသည်။ အလုပ်သမား အဆင့်အတန်း၊ အလုပ်ရှင် အဆင့်အတန်းဟူ၍ လည်း မည်သူမျှ မပြောကြချေ။
“ဒီကောင်တွေ ဆင်းရဲသားတွေ၊ ဒီကောင်တွေ မြန်မာပြည်က လာတဲ့ ကောင်တွေ၊ ဒီကောင်တွေ ပညာမတတ်တဲ့ ကောင်တွေ၊ ဒီကောင်တွေ မွတ်စလင်တွေ” စသည်ဖြင့် ပြောဆို သုံးနှုံးကြသည်ကို သြစတေးလျှမှာ ယခုလောက် ကြာမြင့်စွာ နေထိုင်ခဲ့ပြီး၊ လူအမျိုးမျိုး တို့နှင့် စကားပြောဖူးရာမှာ တစ်ခွန်း တစ်လေပင် မကြားဖူးပါ။ တစ်ဦးနှင့် တစ်ဦး ရန်ဖြစ်၍ ဆဲဆိုသော်မှပင် ထိုကဲ့သို့သော အသုံးအနှုံးများ ဖြင့်ပြောဆို ဆဲဆိုခြင်း မပြုလုပ်ကြပေ။ အကြောင်းမှာကား ထိုသို့သော လူသား အချင်းချင်း ခွဲခြား ဆက်ဆံသူသည်မှာသာ နိမ့်ကျသည့် ယဉ်ကျေးမှု မရှိသူ အဖြစ် ထင်ရှား ပေါ်လွင်စေသောကြောင့် ပင် ဖြစ်ပေသည်။
ထိုသို့ စကား အသုံးအနှုံးများ မပြောဆိုရုံမျှ မက၊ တစ်ဦးနှင့် တစ်ဦး ဆက်ဆံကြရာတွင်လည်း တန်းတူရည်တူ ထားပြီး ဆက်ဆံကြသည်ကို တွေ့နိုင်သည်။ လူတစ်ယောက်သည် အမှိုက်လှည်း သည့်အလုပ်လုပ်နေသူ ဖြစ်စေ၊ အိမ်သန့်ရှင်းလုပ်နေသူဖြစ်စေ၊ ကူလီထမ်းနေသူ ဖြစ်စေ၊ မည်သူ တစ်ဦးတစ်ယောက် ကမှ ခွဲခြား ဆက်ဆံကြသည် မရှိပေ။ မည်သူကမှ သူတို့ကို နိမ့်ကျသည်ဟု မယူဆပေ။ ညဖက် အလုပ်အားချိန် ဘီယာဆိုင်တွင် ကူလီသမားနှင့် ရုံးက မန်နေဂျာ တစ်စားပွဲတည်း ထိုင်သောက်ကြသည် ဆိုသည်မှာ သြစတေးလျတွင် အထူး အဆန်း ကိစ္စမျိုး မဟုတ်ပေ။
မိမိတွေ့ဖူး သလောက် အချို့ကိုပြောရလျှင် လမ်းပေါ်မှာ စုတ်စုတ် ပြတ်ပြတ်နှင့် ညစ်ညစ်ပတ်ပတ် အဖိုးကြီး တစ်ယောက် လမ်းဖြတ်ကူးစဉ်၊ ကုတ်အင်္ကျီ၊ ရှူးဖိနပ်နှင့် သပ်သပ်ရပ်ရပ် သားသားနားနား လူတစ်ယောက် က တလေးတစား လက်တွဲပြီး ကူညီပေးတာမျိုး၊ စားပွဲထိုးရှိသည့် စားသောက်ဆိုင်များတွင် စားပွဲထိုးက သူ့တာဝန်နှင့် သူ စားပွဲကို သန့်ရှင်းရေး လာလုပ်သည်ကို ပင် မိမိထိုင်နေသည့် စားပွဲဖြစ်လျှင် တစ်ပိုင် တစ်နိုင် ကူညီပေးလိုက် သည်မျိုး၊ ရုံးခန်းတွင် တစ်ခါ အိမ်သာပေါက် ပိတ်နေသဖြင့် မိလ္လာ ပြုပြင်သူများကို ခေါ်ပြီး သူတို့လာ ပြုပြင်သည့် အခါတွင် အလုပ်ရှင် ကိုယ်တိုင် ရင်းရင်း နှီးနှီး လက်ဆွဲနှုတ်ဆက် လမ်းပြ ပေးပြီး၊ သူတို့ ပြုပြင် နေသည်မှာ အချိန်ကြာလာသည့် အခါ ကော်ဖီပင် ဖျော်တိုက် ပေးသည်မျိုး၊ ဘစ်ကား စီးသူက သူလိုရာမှတ်တိုင်သို့ ရောက်လျှင် ဆင်းသည့်အခါ ဘတ်စ်ကား မောင်းသူကို ကျေးဇူးတင် စကား ပြောလေ့ရှိတာမျိုး၊ စသည်ဖြင့် အသေးစိတ် လိုက်ပြောလျှင် ကုန်တော့မည် မဟုတ်ပါ။
လူတစ်ဦးနှင့် တစ်ဦး အထင်သေးခြင်း၊ အထင်ကြီးခြင်း လုံးဝမရှိကြဘဲ တစ်ဦးနှင့် တစ်ဦး လေးစားသမှု သာလျှင် ရှိကြပြီး၊ ပညာမတတ်သည် ဖြစ်စေ၊ ငွေမရှိသည် ဖြစ်စေ၊ အလုပ်မကောင်းလျှင် ဖြစ်စေ၊ မျက်နှာငယ်စရာ အကြောင်းမဟုတ်ဘဲ လူတစ်ယောက်ကို လူတန်းစား ခွဲခြားဆက်ဆံတတ်သူ သာလျှင် မျက်နှာပျက်စရာ ရှက်စရာ ဖြစ်ပေသည်။ ဤသည်မှာကား ဥရောပသား နှင့် အနောက်တိုင်းသား တို့၏ လူ့ယဉ်ကျေးမှု တစ်စိတ် တစ်ဒေသဖြစ်သည်။
Little Europe ခေါ် စင်င်္ကာပူသည်၊ သြစတေးလျှလောက် လူမျိုးပေါင်းစုံ၊ နောက်ခံ အခြေအနေပေါင်းစုံ တို့မှ လာရောက်အခြေချသူ ၁၀ ပုံလျှင် ၁ ပုံပင် မရှိပါ။ ထို Little Europe ခေါ် စင်င်္ကာပူသည် European များတွင် ရှိသည့် ယဉ်ကျေးမှု၏ ၁၀ ပုံလျှင် ၁ ပုံပင် မဟုတ်သေးသည့် လူ့အခြေခံ အခွင့်အရေးကို လေးစားတတ်ခြင်းပင် မရှိသည့် စင်င်္ကာပူနိုင်ငံမှာ မိမိကိုယ်မိမိ ဥရောပအငယ်စား ကဲ့သို့ တိုင်းပြည်ဟူ၍ ဂုဏ်ဖော်နေသည်မှာ “ပြောသူမရှက် ကြားသူရှက်စရာ” ပင် ဖြစ်ပါတော့မည်။
မှတ်ချက်..နေဇော်လင်းဘလော့မှ ပြန်လည်ကူးယူတင်ပြခြင်းဖြစ်သည်။
No comments:
Post a Comment